بہت سے بےایمان دکاندار بھی شاید صرف اس لیے بخشے جائیں کہ خواتین سے بحث کے بعد انھوں نے خود کشی نہیں کی۔
کیفیات
راحیلؔ فاروق
فہرست
گروہ بندی دراصل طاقت کی جستجو ہے۔ مذہبی جماعتوں سے لے کر ادبی قبیلوں تک تمام جتھے کمزور لوگوں کے طاقت ور ہجوم ہیں۔ اگر کوئی شخص ان کا حصہ بننے سے انکار کرے تو سمجھنا چاہیے کہ وہ ان سے زیادہ زور آور ہے۔
راحیلؔ فاروق
- کیفیت نامہ
- 12 جولائی 2021ء
- ربط
پانچ اور چھ سال کے دو بچوں کے بستے اٹھا کر دو گلیاں چلنے کا اتفاق ہوا۔ کمر دہری ہو گئی۔ ہمارا تعلیمی نظام انسانوں کو اتنی کامیابی سے گدھا بنا رہا ہے کہ میں یہ حقیقت ان بچوں کے ماں باپ تک کو نہیں سمجھا سکتا۔
راحیلؔ فاروق
- کیفیت نامہ
- 29 جون 2021ء
- ربط
مذہبی لوگوں کا مذہب سے اتنا ہی تعلق ہے جتنا چینی کا چین سے!
راحیلؔ فاروق
- کیفیت نامہ
- 21 جون 2021ء
- ربط
میں نے دیکھا ہے کہ اکثر گناہ اگر آپ کے اندر نہ پائے جائیں تو آپ کو دوسروں میں بھی نظر نہیں آتے۔
راحیلؔ فاروق
- کیفیت نامہ
- 27 مئی 2021ء
- ربط
مجھے ایک دیہاتی نے سمجھایا کہ ماں کیا ہے۔
ماں جی بیمار تھیں اور میں بیٹھا ان کے پاؤں داب رہا تھا۔ دیہات سے ایک رشتہ دار حال پوچھنے آئے۔ مجھے دیکھ کر کہنے لگے، "شاباش۔ خیال رکھا کرو۔ آج کل نبی نہیں آتے۔ آج کل (ماں جی کی طرف اشارہ کر کے) یہی ہوتے ہیں۔"
راحیلؔ فاروق
- کیفیت نامہ
- 9 مئی 2021ء
- ربط
کبھی کبھی مجھے لگتا ہے کہ ہر وہ کام فن ہے جس کا تصور جنت میں کیا جا سکے۔ موسیقی، شاعری، رقص، نقش گری!
کیا آپ وہاں وکیلوں، طبیبوں، ریاضی دانوں اور دکان داروں کا تصور بھی کر سکتے ہیں؟
راحیلؔ فاروق
- کیفیت نامہ
- 24 اپریل 2021ء
- ربط
سچے مذاہب نے اونچے معیارات قائم کیے ہیں۔ ان تک پہنچنے والا انسان فلاح پاتا ہے۔ جھوٹے مذاہب نے اور بھی اونچے معیارات قائم کیے ہیں۔ ان تک انسان پہنچ ہی نہیں سکتا۔
راحیلؔ فاروق
- کیفیت نامہ
- 8 اپریل 2021ء
- ربط
کیا آپ نے گزشتہ نصف صدی میں کوئی ایسا مجموعۂ کلام پڑھا ہے جس کے دیباچے میں شاعر کا منفرد لب و لہجہ تخلیقی وفور سے ملاپ کر کے گہرے عصری شعور کو چونکا دینے والے تجربات کے ذریعے جمالیاتی اعتبار سے نئے امکانات میں نہ ڈھال رہا ہو؟
راحیلؔ فاروق
- کیفیت نامہ
- 4 اپریل 2021ء
- ربط
سات ارب انسانوں کی دنیا میں ایک بھی ایسا نہیں جو کسی دوسرے کو بچا سکے۔ ایک بھی ایسا نہیں جو خود بچ سکے۔ سب چلتے پھرتے، جیتے جاگتے لوگ فنا کا مال ہیں۔ آج نہیں تو کل مٹی میں مل جانے والے ہیں۔ یہ رونقیں، یہ دلچسپیاں، یہ لگاؤ، یہ محبتیں، یہ کام، یہ مصروفیات کتنا بڑا دھوکا ہیں!
راحیلؔ فاروق
- کیفیت نامہ
- 30 مارچ 2021ء
- ربط
تکبر سب سے زیادہ متکبر کو کھٹکتا ہے۔ چور کو چور پہچانتا ہے۔ زانی سے زانی کو چڑ ہوتی ہے۔ بزدل بزدلوں پر قہقہے لگاتا ہے۔ جھوٹا جھوٹ پکڑتا ہے۔ دردمند دردمندوں کو پا جاتا ہے۔ سخی سخیوں سے مقابلہ کرتا ہے۔ حسین حسینوں سے ہوشیار رہتا ہے۔ عاشق عاشقوں کو تاڑ لیتا ہے۔ دلیر دلیروں پر آنکھ رکھتا ہے۔
ہمیں دیکھنا چاہیے کہ ہمیں کیا اچھا لگتا ہے اور کیا برا۔ سمجھنا چاہیے کہ ہم کتنے اچھے ہیں اور کتنے برے۔
راحیلؔ فاروق
- کیفیت نامہ
- 25 مارچ 2021ء
- ربط
راحیلؔ فاروق
پنجاب (پاکستان) سے تعلق رکھنے والے اردو ادیب۔
کیفیات
چھوٹی چھوٹی باتیں۔ جذبات، کیفیات، احساسات اور خیالات۔ سماجی واسطوں پر دیے جانے والے سٹیٹس (status) کی طرح!
آپ کے لیے
قُلْ لَّآ اَجِدُ فِىْ مَآ اُوْحِىَ اِلَىَّ مُحَرَّمًا عَلٰى طَاعِمٍ يَّطْعَمُهٝٓ اِلَّآ اَنْ يَّكُـوْنَ مَيْتَةً اَوْ دَمًا مَّسْفُوْحًا اَوْ لَحْـمَ خِنزِيْرٍ فَاِنَّهٝ رِجْسٌ اَوْ فِسْقًا اُهِلَّ لِغَيْـرِ اللّـٰهِ بِهٖ ۚ فَمَنِ اضْطُرَّ غَيْـرَ بَاغٍ وَّلَا عَادٍ فَاِنَّ رَبَّكَ غَفُوْرٌ رَّحِيْـمٌ (انعام: 145)
کہہ دو کہ میں اس وحی میں جو مجھے پہنچی ہے کسی چیز کو کھانے والے پر حرام نہیں پاتا جو اسے کھائے مگر یہ کہ وہ مردار ہو یا بہتا ہوا خون یا سور کا گوشت کہ وہ ناپاک ہے یا وہ ناجائز ذبیحہ جس پر اللہ کے سوا کسی اور کا نام پکارا جائے، پھر جو بھوک سے بے اختیار ہوجائے ایسی حالت میں کہ نہ بغاوت کرنے والا اور نہ حد سے گزرنے والا ہو تو تیرا رب بخشنے والا مہربان ہے۔
حدیث رسول اللہ صلی اللہ علیہ وسلم کی کہی ہوئی بات کو کہتے ہیں۔ اس آیت میں اللہ تعالیٰ نے پیغمبرِ پاکؐ کو حکم دیا ہے کہ وہ کہیں کہ ان تک جو وحی پہنچی ہے اس کی رو سے مردار، خون، سؤر یا غیر اللہ کے ذبیحے کے سوا کوئی شے کھانے والوں پر حرام نہیں۔ الخ۔ مگر کتنی دلچسپ بات ہے کہ احادیث کے کسی مجموعے میں اس مضمون کی ایک بھی حدیث نہیں ملتی!
گویا احادیث کی رو سے کوئی ثبوت نہیں کہ رسولِ مصطفیٰؐ نے اللہ تعالیٰ کے اس فرمان پر عمل کیا ہو۔ نعوذ باللہ، معاذ اللہ۔ الٹا جو روایات حلت و حرمت پر ملتی ہیں وہ اللہ کے دیے ہوئے اس حکم کے یکسر خلاف ہیں۔ ثم معاذ اللہ!
اللہ عزوجل نے قرآنِ مجید میں بالتصریح فرمایا ہے کہ رحمت اللعالمینؐ اپنی خواہش یا مرضی سے کچھ نہیں کہتے۔ پھر کیا وجہ ہے کہ اللہ ایک بات کہنے کا حکم دے اور وہ ہمارے نبیؐ کبھی کسی سے نہ کہیں اور جس بات کا اشارہ تک قرآن میں نہ ملے اس پر تواتر سے احادیث مل جائیں؟
راحیلؔ فاروق
- کیفیت نامہ
- 20 ستمبر 2020ء
- ربط
ادب سے تعلق کو ڈیڑھ دہائی سے اوپر کا عرصہ ہو چلا۔ اس دوران میں قسم قسم کے ہزار ہا لوگوں سے واسطہ رہا ہے۔ ان میں شاعر بھی تھے، ادیب بھی، ادب کے طلبہ بھی، ناقد بھی، اساتذہ بھی، سیدھے سادے پڑھنے والے بھی۔ لیکن عجیب بات ہے کہ جن شخصیات کے ذوق نے مجھے سب سے متاثر کیا ان کی اکثریت خواتین پر مشتمل ہے۔ وہ خواتین نہیں جو ادب کے منظر نامے پر شاعرہ، ناقدہ یا ادیبہ کی حیثیت سے نمایاں ہیں۔ بلکہ وہ جو خاموش قاری ہیں۔ گھروں میں بیٹھی کتابیں پڑھا کرتی ہیں۔ یا بعض ایسی جو استاد ہیں۔ بچوں کو پڑھاتی ہیں۔ یا پھر خاص طور پر وہ جنھیں رسمی تعلیم کا موقع نہیں ملا اور انھوں نے اس محرومی کی کسر خود پڑھ پڑھ کر نکال دی۔
یہ سچ ہے کہ ان کا مزاج عموماً تحقیقی نہیں ہوتا مگر وجدانی اور ذوقی سطح پر میں نے اکثر خواتین کو مردوں سے بہت بلند پایا ہے۔ عربی، فارسی، پنجابی، اردو اور انگریزی ادبیات میں تبحر کے وہ نظارے دیکھے ہیں کہ یقین نہیں آیا کہ یہ کوئی عورت ہے۔ حافظہ خواتین کا مشہور ہے۔ بلامبالغہ ہزاروں کی تعداد میں برمحل اشعار، اقتباسات اور حکایات مردوں میں آج کل شاید ہی کسی کو مستحضر ہوں مگر یہ خیر سے سوتے میں بھی سنا سکتی ہیں۔ پھر بعض جو شوقیہ شعر کہتی ہیں وہ ایسے سادہ، پراثر اور تر ہیں کہ آدمیوں کے منہ سے نہیں سنے۔ زبان کی باریکیوں سے واقف بےشک کم دیکھی ہیں مگر مطالعۂ ادب اور شعر فہمی میں ایک سے بڑھ کر ایک۔ ارتکاز کی قوت بھی شاید عورتوں کو مردوں سے زیادہ ودیعت ہوئی ہے۔ گہرا مطالعہ اس کے بغیر نہیں ہو سکتا۔ لہٰذا مرد جہاں محض نظر ڈال کر گزر جاتے ہیں یہ وہاں ڈوب کر رہ جاتی ہیں۔ ایک ایک سطر قلب و روح پر نقش ہوتی جاتی ہے اور پھر تمام عمر اس کا پرتو نظر آتا رہتا ہے۔
راحیلؔ فاروق
- کیفیت نامہ
- 4 اگست 2022ء
- ربط
میں نے زندگی میں گنتی کے چند لوگ دیکھے ہیں جو اپنی غلطی ببانگِ دہل تسلیم کرنے کا جگرا رکھتے ہوں۔ اگر آپ کے ارد گرد کوئی شخص ایسا پایا جاتا ہے تو اس کی قدر کیجیے۔ شاید آپ کو اندازہ نہ ہو مگر یہ انسانوں میں پائی جانے والی نایاب ترین خوبیوں میں سے ایک ہے۔
راحیلؔ فاروق
- کیفیت نامہ
- 12 اپریل 2022ء
- ربط
یا آدمی شراب نہ پیے یا عدمؔ کے سے شعر بھی کہے!
میں مے کدے کی راہ سے ہو کر نکل گیا
ورنہ سفر حیات کا کافی طویل تھا
راحیلؔ فاروق
- کیفیت نامہ
- 6 جون 2022ء
- ربط