جذبے شکست پر بھی وہی ہیں سپاہ کے
ہیں شاہ سے بھی آگے وفادار شاہ کے
نیت ثواب کی ہے ارادے گناہ کے
مسجد کو جا رہے ہیں طلبگار جاہ کے
شبنم شعاعِ مہر کی تنہا نہیں شکار
مارے ہوئے ہیں ہم بھی کسی کی نگاہ کے
انسان تھے بشر تھے میاں آدمی تھے تم
کیا کر دیا ہے ہم نے تمھیں چاہ چاہ کے
پورے تو بندگی کے تقاضے کہاں ہوئے
پتھر ہی گھِس چلے ہیں مری سجدہ گاہ کے
کیا داد دے سکیں گے تمھارے کلام کی
خود رفتگاں نہ آہ کے قائل نہ واہ کے
کلیاں تمھارے ذوق کو کافی نہ ہو سکیں
راحیلؔ چنتے آئے ہو کانٹے بھی راہ کے
4 خیالات ”جذبے شکست پر بھی وہی ہیں سپاہ کے“ پر
راحیل بھائی !
بہت خوبصورت غزل ہے۔
بہت سی داد حاضرِ خدمت ہے۔
عنایت، احمد بھائی۔ اللہ بہت خوش رکھے!
اللہ الله! ہر ایک شعر پر داد! 🙏
مارے ہوئے ہیں ہم بھی کسی کی نگاہ کے۔
آفرین آفرین!
انسان تھے بشر تھے میاں آدمی تھے تم
کیا کر دیا ہے ہم نے تمھیں چاہ چاہ کے
واہ واہ واہ