دعا سلام بہت ہے کلام رہنے دے

5 فروری 2018 ء

دعا سلام بہت ہے کلام رہنے دے
جو لوگ عام ہیں ان کو تو عام رہنے دے

ارادہ باندھ غمِ انتظام رہنے دے
خدا کے ذمے بھی دو چار کام رہنے دے

جہانِ شوق کی تعمیر حسرتیں کر لیں
کچھ اور دیر انھیں ناتمام رہنے دے

ستم نہ کر تو کسی اور پر نہ کر صیاد
جو آ گئے ہیں انھیں زیرِ دام رہنے دے

عظیم ذہن کا ہے حافظہ عظیم ترین
مجال ہے کہ خدا کا بھی نام رہنے دے

تکلفات مساجد میں اچھے لگتے ہیں
سجودِ شوق کو بےاہتمام رہنے دے

مجھے خرید مجھے بیچ لیکن ایک ہی ہاتھ
غلام جس کا ہوں اس کا غلام رہنے دے

حقیقتوں کی حقیقت بھی کچھ نہیں کمبخت
خیالِ خام کو راحیلؔ خام رہنے دے

راحیلؔ فاروق

پنجاب (پاکستان) سے تعلق رکھنے والے اردو شاعر۔

یہ کلام اپنے دوست احباب سے شریک کیجیے
Share on facebook
Share on twitter
Share on pinterest
Share on reddit
Share on linkedin
Share on whatsapp
Share on telegram
Share on email
لطفِ سخن کچھ اس سے زیادہ

خوش آمدید۔ آپ کی یہاں موجودگی کا مطلب ہے کہ آپ کو اردو گاہ کے جملہ قواعد و ضوابط سے اتفاق ہے۔ تشریف آوری کا شکریہ!