اردو کے نقوش پنجابی، سندھی، دکنی، برج بھاشا، کھڑی بولی اور سنسکرت وغیرہ جیسی مقامی بولیوں کی دین ہیں مگر اس کے رنگ عربی، فارسی، ترکی، انگریزی، پرتگالی، اطالوی وغیرہ جیسی بدیسی زبانوں سے مستعار ہیں۔ ارتقائی اعتبار سے اسے لشکری کہنا ممکن ہو یا نہ ہو مگر اپنی ساخت کے لحاظ سے یہ واقعی دیس دیس کے پھول بوٹوں کا ایک دلآویز گلدستہ ہے۔ پھر زبان ہی نہیں، ادب کی بھی یہی کیفیت ہے۔ اس نے قصیدہ اہلِ عرب سے لیا، رباعی اور غزل ایرانیوں سے، گیت ہندوستان کی مدھرتا سے، افسانہ اور ناول مغرب سے، داستان ایشیا سے، نظم کی اکثر ہیئتیں یورپ سے، تنقیدی روایت ہر کہیں سے اور مرثیہ خود پیدا کیا۔ کون کہہ سکتا ہے کہ یہ زبان اور اس کا ادب عالمِ تہذیب کا ایک جیتا جاگتا معجزہ نہیں؟