حسرت رنگین ہو گئی ہے

حسرت رنگین ہو گئی ہے
تجھ سے بھی حسین ہو گئی ہے

رازوں کی امین ہو گئی ہے
خاموشی دین ہو گئی ہے

تشکیک کے دشت میں جہالت
غش کھا کے یقین ہو گئی ہے

آئین آئین کر رہے ہو
طاقت آئین ہو گئی ہے

علامہ کے منہ پہ عقل کی بات
بجتی ہوئی بین ہو گئی ہے

معصوم محبت آہ بھر کے
معصوم ترین ہو گئی ہے

بارش کی دعا پہ میکدے میں
آمین آمین ہو گئی ہے

راحیلؔ رواں ہوئی ہے جب طبع
پانی سی زمین ہو گئی ہے

راحیلؔ فاروق

راحیلؔ فاروق

راحیلؔ فاروق پاکستانی پنجاب سے تعلق رکھنے والے اردو شاعر ہیں۔

فہرستِ کلام
یہ کلام اپنے دوست احباب سے شریک کیجیے
Share on facebook
Share on twitter
Share on whatsapp
Share on telegram
Share on email
لطفِ سخن کچھ اس سے زیادہ

آپ کیا فرماتے ہیں بیچ اس مراسلے کے؟