تکلم پہ لکھوں تبسم پہ لکھوں
کوئی نظم کوئی غزل تم پہ لکھوں
میں لکھوں تمھاری نظر کے قصیدے
دلِ زار کے پھر تلاطم پہ لکھوں
ابھی خشک ہیں لب ابھی مردہ ہے دل
مسیحا جِلائے تو کچھ قُم پہ لکھوں
محبت میں لکھوں تصور کا رتبہ
نمازِ وفا کے تیمم پہ لکھوں
فلک جانتا ہی نہیں نور کیا ہے
ان آنکھوں کو پڑھ لوں تو انجم پہ لکھوں
کوئی آنکھ اٹھے تو پردے اٹھاؤں
کوئی لب کھُلیں تو ترنم پہ لکھوں
نہ ہو فاش اگر رازِ تقدیرِ آدم
خطِ نسخ میں عشق گندم پہ لکھوں
نشے میں ہوں راحیلؔ اور چاہتا ہوں
غزل اٹھ کے یہ گردنِ خُم پہ لکھوں
1 خیال ”تکلم پہ لکھوں تبسم پہ لکھوں“ پر
ماشاء اللہ !
ہر بول ترا دل سے ٹکرا کے گزرتا ہے کچھ رنگِ بیاں حالیؔ ہے سب سے جُدا ترا