خاص لوگوں کو راس ہوتا ہے

اردو شاعری

خاص لوگوں کو راس ہوتا ہے
عشق مردم شناس ہوتا ہے

جو کسی کا قیاس ہوتا ہے
آس کے آس پاس ہوتا ہے

اتنی بھی کیجیے نہ دل جوئی
یوں تو دل اور اداس ہوتا ہے

غم چھپانے کی شے نہیں لیکن
پاس والوں کا پاس ہوتا ہے

آدمی کا کوئی لباس نہیں
آدمی خود لباس ہوتا ہے

ماورائے نظر نظر رکھیے
بدنظر بدحواس ہوتا ہے

تیری ہونٹوں پہ ہے نظر ساقی
ورنہ پیاسا بھی پیاس ہوتا ہے

سینے میں دو جہان رکھتے ہیں
جیب میں سو پچاس ہوتا ہے

صابر ایسے بھی تم نہیں راحیلؔ
شعر بھی تو بھڑاس ہوتا ہے

راحیلؔ فاروق

پنجاب (پاکستان) سے تعلق رکھنے والے اردو شاعر۔

یہ کلام اپنے دوست احباب سے شریک کیجیے
Share on facebook
Share on twitter
Share on pinterest
Share on reddit
Share on linkedin
Share on whatsapp
Share on telegram
Share on email
لطفِ سخن کچھ اس سے زیادہ