کسی نے کیسے نبھائی ہے آسماں سے نہ پوچھ

کسی نے کیسے نبھائی ہے آسماں سے نہ پوچھ
نہ پوچھ طائرِ گم‌کردہ‌آشیاں سے نہ پوچھ

سحر بجائے خود اک داستاں نہ ہو جائے
حکایتِ شبِ رفتہ مری اذاں سے نہ پوچھ

ترے جمال کو محشر سمجھ رہے ہیں لوگ
امڈ کے آئی ہے خلقت کہاں کہاں سے نہ پوچھ

جواب اور تو مل جائیں گے سبھی لیکن
مرا قصور ہی اربابِ دو جہاں سے نہ پوچھ

لگا نقوشِ قدم کا سراغ آپ ذرا
یہ باغ کس نے اجاڑا ہے باغباں سے نہ پوچھ

جو خوش‌بیاں ہیں سنا دیں گے یوں بھی سب احوال
جو بے‌زباں کا فسانہ ہے بے‌زباں سے نہ پوچھ

اگرچہ عشق ہے پورے وجود کا دشمن
مگر جو دل پہ گزرتی ہے نیم‌جاں سے نہ پوچھ

ہر اک نگاہ پہ کھلتا نہیں وہ در راحیلؔ
ادھر کا راستہ سالارِ کارواں سے نہ پوچھ