جو دوا دل کی کارگر دیکھی
دوسری بار بے اثر دیکھی
رات کے اس سے پوچھیے حالات
جس نے آنکھوں میں کاٹ کر دیکھی
بزم میں کون کون تھا موجود
بزم کی بزم بے خبر دیکھی
ہم نہیں مانتے تھے کوشش کو
خیر کوشش بھی سب نے کر دیکھی
آپ نے آئنہ ہی بس دیکھا
آپ نے عاشقی کدھر دیکھی
بےرخی ایک شے محبت میں
دیکھنے کی نہ تھی مگر دیکھی
عمر بھی ایک راہ تھی راحیلؔ
دیکھنی تھی سو عمر بھر دیکھی
پنجاب (پاکستان) سے تعلق رکھنے والے اردو شاعر۔
راحیلؔ فاروق کی شاعری۔ غزلیات، رباعیات، آزاد، معریٰ اور پابند نظمیں، دوہے، قطعات۔۔۔ سرگشتۂ خمارِ رسوم و قیود!
اردو گاہ کے مندرجات لفظاً یا معناً اکثر کتب، جرائد، مقالات اور مضامین وغیرہ میں بلاحوالہ نقل کیے جاتے ہیں۔ اگر آپ کسی مراسلے کی اصلیت و اولیت کی بابت تردد کا شکار ہیں تو براہِ کرم اس کی تاریخِ اشاعت ملاحظہ فرمائیے۔ توثیق کے لیے web.archive.org سے بھی رجوع لایا جا سکتا ہے۔