ضوابط

من آن نیم که حلال از حرام نشناسم
شراب با تو حلال است و آب بی تو حرام

(سعدیؔ)

میں وہ نہیں کہ جسے حلال اور حرام کا فرق معلوم نہ ہو۔ شراب تیرے ساتھ حلال ہے اور پانی تیرے بغیر حرام!

بےوقوف آدمی کی ایک پہچان یہ ہے کہ اسے فائدہ پہنچانا نقصان پہنچانے سے زیادہ مشکل ہوتا ہے۔

ہم گناہگار انسان کو انسان نہیں سمجھتے۔ نیک انسان کو تو بالکل ہی انسان نہیں سمجھتے۔ پھر چراغ لے کر انسانیت ڈھونڈنے نکل پڑتے ہیں!

کاملی گفتست میباید بسی
علم و حکمت تا شود گویا کسی

لیک باید عقل بی حد و قیاس
تا شود خاموش یک حکمت شناس

(شیخ فرید الدین عطارؔ)

ترجمہ

ایک کامل کا قول ہے کہ بولنے کے لیے بڑے علم اور حکمت کی ضرورت ہے۔ لیکن چپ ہونے کے لیے حکمت والے کو (اس سے بھی زیادہ یعنی) بے انتہا عقل کی ضرورت پڑتی ہے۔

تھوڑا عرصہ پہلے تک میرا خیال تھا کہ میں بہت بدزبان ہوں۔ اور یہ کچھ ایسا غلط بھی نہ تھا۔ زبان گویا منہ کی پٹاری میں ایک پھنکارتا ہوا ناگ تھی جو بےقابو ہو کر خود سپیرے کے ہاتھ سے نکل جاتی تھی۔ بڑی دعاؤں اور ریاضتوں کے بعد کمبخت کو کسی قدر رام کرنے میں کامیاب ہوا۔ اب دیکھتا ہوں تو اردگرد عالم ہی اور ہو چلا ہے۔ اچھے خاصے مہذب لوگ جن سے موازنے کر کے میں خود کو شرم دلایا کرتا تھا، روزہ توڑ کر اتنی گندی گندی باتوں پر اتر آئے ہیں کہ مجھے توبہ پر شرم آنے لگی ہے۔ لہٰذا ایک مصرع حسبِ حال لکھتا ہوں۔ تھوڑی سی بدتمیزی بطورِ نمونہ لف ہے۔ معاف کیجیے گا!

میں ہوا کافر تو وہ کنجر مسلماں ہو گیا