پھرتے تھے دشت دشت دوانے کدھر گئے
وے عاشقی کے ہائے زمانے کدھر گئے
مژگاں تو تیز تر ہیں ولیکن جگر کہاں
ترکش تو سب بھرے ہیں نشانے کدھر گئے
کہتے تھے ہم کوں اب نہ ملیں گے کسی کے ساتھ
عاشق کے دل کوں پھر کے ستانے کدھر گئے
جاتے رہے پے نانْو بتایا نہ کچھ مجھے
پوچھوں میں کس طرح کہ فلانے کدھر گئے
میں گم ہوا جو عشق کی رہ میں تو کیا عجب
مجنون و کوہ کن سے نہ جانے کدھر گئے
اب روبرو ہے یار نہیں بولتا سو کیوں
قصے وہ آبروؔ کے بنانے کدھر گئے
