دنیا کی نعمتیں رنگا رنگ ہیں۔ مال نعمت ہے، اولاد نعمت ہے، محبت نعمت ہے، صحت نعمت ہے، عزت نعمت ہے، طاقت نعمت ہے۔ یہ سب ہیں اور ان کی قدر تب معلوم ہوتی ہے جب انسان انھیں کھو بیٹھتا ہے۔ مگر ایک نعمت اور ہے۔ اور وہ ایسی انوکھی ہے کہ جس کے پاس ہو اسی کو اس کی قدر معلوم ہوتی ہے۔ جو محروم ہے اسے اندازہ ہی نہیں ہوتا کہ وہ کیسا بد نصیب ہے۔
اس نعمت کو علم کہتے ہیں!
پنجاب (پاکستان) سے تعلق رکھنے والے اردو ادیب۔
چھوٹی چھوٹی باتیں۔ جذبات، کیفیات، احساسات اور خیالات۔ سماجی واسطوں پر دیے جانے والے سٹیٹس (status) کی طرح!
سالِ نو مبارک ہو!
کیا آپ جانتے ہیں کہ اس جملے کا مطلب دراصل کیا ہے؟ مبارک عربی زبان کا لفظ ہے جو برکت کے مادے سے نکلا ہے۔ اس کے معانی ہیں برکت دیا گیا۔ وہ شخص، شے، مقام یا وقت جسے برکت عطا کی گئی ہو۔ جب آپ کسی کو سالِ نو مبارک یا نیا سال مبارک کہتے ہیں تو گویا دعا دیتے ہیں کہ اس کے لیے نیا سال برکت والا ہو۔
یہ دعا مکمل طور پر بیان کی جائے تو یوں ہو گی:
آپ کے لیے/تمھارے لیے/تیرے لیے نیا سال مبارک ہو۔
زبانوں کا عام قاعدہ ہے کہ بلاغت پیدا کرنے کے لیے مختلف الفاظ مختلف موقعوں پر حذف کر دیے جاتے ہیں۔ دعا یا اظہارِ تمنا وغیرہ کا بھی یہی سلسلہ ہے۔ لہٰذا "آپ کے لیے/تمھارے لیے/تیرے لیے" وغیرہ حذف کر کے "نیا سال مبارک ہو" کہا جاتا ہے۔ بہت بار آخر میں آنے والا "ہو" بھی محذوف ہو جاتا ہے اور فقط "نیا سال مبارک" کہہ دیتے ہیں۔ یہ اس دعا کی بلیغ ترین صورت ہے۔
میں بھی آپ کے لیے دعا گو ہوں۔۔۔
نیا سال مبارک!