اہم اردو ویب گاہیں
زبان و ادب
اردوئے معلّٰی
انٹرنیٹ پر حمد و نعت اور سلام و منقبت کا سب سے بڑا یونیکوڈ اردو ذخیرہ۔ یونیکوڈ سے سادہ طور پر یہ مراد ہے کہ تمام مواد ٹائپ شدہ شکل میں دستیاب ہے اور بآسانی تلاش اور نقل کیا جا سکتا ہے۔ علاوہ ازیں، شعر و ادب کا بھی معتد بہ سرمایہ اس قیمتی ویب گاہ پر فراہم کر دیا گیا ہے۔ متعدد جدید شعرا کے مکمل مجموعہ ہائے کلام اہلِ ذوق کے لیے بالکل مفت میسر ہیں۔
ویب گاہ کے روح و رواں ڈاکٹر عامر شہزاد صاحب ہیں جو طب کے ساتھ ساتھ ادب سے بھی محبت کا رشتہ قائم رکھے ہوئے ہیں۔ اللہ انھیں سلامت رکھے اور ان کی کاوشوں میں برکت ڈالے!
بازگشت
یوٹیوب پر ایک دہائی سے زیادہ عرصے سے زبان و ادب کی خدمت میں سرگرم علامہ راغب اختر ہندوستان سے تعلق رکھتے ہیں۔ اپنے چینل کی صورت میں انھوں نے معیاری ادب کے فروغ میں قابلِ قدر کام کیا ہے۔ ہمیں خوشی ہے کہ اب ان کی باقاعدہ ویب گاہ بھی منظرِ عام پر آ گئی ہے۔ علامہ صاحب اردو میں ڈاکٹریٹ کی سند رکھتے ہیں اور یہ بات بلاخوفِ تردید کہی جا سکتی ہے کہ اس سطح کے آدمی انٹرنیٹ کی اردو دنیا میں بہت کم اس قدر متحرک نظر آتے ہیں۔
ویب گاہ کے علاوہ بازگشت کا یوٹیوب چینل اور فیس بک صفحہ بھی دیکھنے کے لائق ہیں۔ صلائے عام ہے یارانِ نکتہ داں کے لیے!