لہجہ

زبان کی نسبت یہ خیال ہم نے اکثر ظاہر کیا ہے کہ اس کا مدار تحریر کی بجائے کلام پر ہے۔ تحریر محض کلام کی کاغذ پر اتاری ہوئی نقل ہے۔ اولیت اور اصلیت کا تاج کلام یعنی بول چال کے سر ہے۔ لہٰذا ہماری رائے میں  زبان کو سمجھنے اور برتنے کا صحیح ذوق گفتگو سے پیدا ہوتا ہے۔ لکھنا پڑھنا اسی ذوق کو  پاکیزہ تر کر دیتا ہے مگر پیدا نہیں کر سکتا۔ ادب دراصل خود بھی پاکیزہ کلام ہی کی ایک شکل ہے جو تحریر کی صورت میں محفوظ کر لی گئی ہو۔

کلام اپنے حسن اور ابلاغ کے لیے الفاظ کے علاوہ تلفظ، لہجے، آہنگ اور طرزِ ادا وغیرہ پر بھی انحصار کرتا ہے۔ تحریر میں یہ چیز نہیں ہوتی۔ اس لیے جو علم کلام سے حاصل ہوتا ہے وہ تحریر سے حاصل نہیں ہو سکتا۔ یہی سبب ہے کہ کتاب کو استاد کا متبادل نہیں مانا گیا۔ استاد کلام کرتا ہے جبکہ کتاب تحریر پیش کرتی ہے۔ کلام مطالب کی راہ لہجے، زیر و بم اور ادا کے ذریعے نہایت آسان کر دیتا ہے مگر تحریر کے معانی کی منازل تمام تر قاری کو خود طے کرنی پڑتی ہیں۔ گویا کلام شخصیت ہے اور تحریر فقط اس کی تصویر۔ فرق صاف ظاہر ہے۔