قراردادِ نفاذِ اردو

بہت لوگوں کو لہجہ کی حالیہ پیشکش سے گمان گزرا کہ جناب تہذیب حافیؔ نے شیخ بقاء اللہ خاں بقاؔ کی غزل سے سرقہ کیا ہے۔ ہم نے بقاؔ کا ایک شعر تعقید کے سبب چھوڑ دیا تھا۔ وہ بھی دیکھ لیجیے:

بزم میں شیخ جی اب ہے کہ ہے یاں عیب نہیں
فرش پر گر نہ ملی جا تو تلے بیٹھ گئے

اگرچہ اس شعر سے یاروں کا گمان یقین میں بدل جائے گا تاہم ہم شاعرِ موصوف پر یہ تہمت عائد کرنا مناسب نہیں سمجھتے۔ ادب میں سرقہ ثابت کرنا فقۂ اسلامی میں زنا ثابت کرنے جتنا مشکل ہے۔ ہو سکتا ہے کہ آپ کو یقین ہو بلکہ یہ بھی ہو سکتا ہے کہ آپ نے ہوتے ہوئے دیکھا ہو مگر نیتوں کا حال تو صرف اللہ جانتا ہے۔

تفنن برطرف، ہم آپ کو ادب میں سرقہ کی نسبت اپنے خیالات پر نظرِ ثانی کرنے کی دعوت دیتے ہیں۔ ذیل میں ایک مضمون کا ربط دیا گیا ہے جس میں ہم نے سرقہ کی نسبت اکابرینِ ادب کی آرا اور رویے نقل کیے ہیں:

سرقہ، شعر اور اس کے حقوقِ ملکیت

میں کہتا ہوں کہ اس کائنات کا ایک خدا ہے۔ ایک شخص ناک سکیڑ کر کہتا ہے، نہیں۔ تم ایک احمقانہ واہمے کا شکار ہو۔ مجھے غصہ آ جاتا ہے۔ کس لیے؟

اس لیے کہ خدا جھٹلایا گیا؟ نہیں۔ بلکہ اس لیے کہ میں جھٹلایا گیا۔

سمجھنا چاہیے کہ جو ہے سو ہے۔ اور جو نہیں ہے سو نہیں ہے۔ کسی کے نہ ماننے سے موجود معدوم نہیں ہو جاتا اور کسی کے مان لینے سے معدوم موجود نہیں ہو جاتا۔ اگر خدا ہے تو اسے کسی کے اقرار یا انکار کی کیا پروا ہو سکتی ہے؟ ایک حقیر سی مکھی کو تو اس سے فرق پڑتا نہیں کہ کوئی اسے تسلیم کرتا ہے یا نہیں۔ خدا کو کیسے پڑ سکتا ہے؟

ہاں، البتہ میری اپنی ذات کو فرق پڑتا ہے۔ اور بہت پڑتا ہے۔ جھٹلانے والے نے میرا تصور جھٹلا دیا۔ میری بات رد کر دی۔ میرے ایمان کا انکار کر دیا۔ میری توہین کر دی۔ میرا تصور، میری بات، میرا ایمان، میری آبرو اس کی تصدیق کے محتاج تھے۔ وہ اس نے نہیں کی۔ مجھے اس لیے غصہ آتا ہے۔

وَقَالَ مُوۡسٰٓى اِنۡ تَكۡفُرُوۡۤا اَنۡـتُمۡ وَمَنۡ فِى الۡاَرۡضِ جَمِيۡعًا ۙ فَاِنَّ اللّٰهَ لَـغَنِىٌّ حَمِيۡدٌ‏ ۞

(سورۂ ابراهيم - آیت 8)

اور موسیٰ نے کہا کہ اگر تم انکار کرو اور وہ سب بھی جو زمین میں ہیں تو بھی اللہ بے نیاز اور حمد کے لائق ہے۔