ادبِ عالیہ

تعارف

مجلسِ برقی اشاعتِ ادبیاتِ عالیہ

کسی زبان کا اعلی ترین اور معیاری ادبی سرمایہ ادبِ عالی، ادبِ عالیہ اور کلاسیکی ادب کہلاتا ہے جبکہ اس کے باضابطہ مطالعہ کو ادبیاتِ عالیہ کہتے ہیں۔ ادب عالیہ کی تعریف، حدود اور اوصاف کے ذیل میں پروفیسر قمر رئیس لکھتے ہیں: "قدما کا تخلیق کردہ وہ ادب جو پختگئ فن اور جمالیاتی لطف و انبساط کے ساتھ دوامی اوصاف کا حامل ہو۔ جو ایک زندہ روایت کا درجہ حاصل کرکے آنے والی پیڑھیوں کو متاثر کر سکے۔ ہر عہد، جس کی قدر و قیمت اور معنویت کو از سر نو تلاش کرے۔ اور پھر جس کے گھنے سائے  تلے نئے تخلیقی پودے نمو پا کر برگ و بار لائیں۔”

اردو جدید دنیا کی ترقی یافتہ زبان ہے جو اپنا ایک مضبوط، توانا، منفرد اور معیاری ادب رکھتی ہے۔ گو کہ اہل اردو تا حال اس باب میں متفق نہیں ہیں کہ کس عہد کے ادب کو اردو کے ادبِ عالیہ میں شمار کیا جائے گا، تاہم ایک محتاط اور متوازن رائے یہ پائی جاتی ہے کہ تقسیمِ ہند سے قبل کا معیاری ادب اردو کا ادبِ عالیہ ہے۔ اسی عہد میں اردو نے ترقی کے وہ مدارج طے کیے جو پھر اسے نصیب نہ ہوئے۔ موجودہ اردو کے سارے خوش نما بال و پر اسی عرصہ کے مرہون منت ہیں۔
(ویکیپیڈیا)

اردو سے محبت کرنے والے وہ لوگ جو عصری تقاضوں سے بھی کماحقہٗ آگاہ ہیں، یہ ضرورت محسوس کرتے آئے ہیں کہ اردو کا ادبِ عالیہ انٹرنیٹ پر ٹائپ شدہ صورت میں موجود ہونا چاہیے۔ اس صورت میں ان شہ پاروں کی تلاش اور نمود غیرمعمولی طور پر آسان ہو جائے گی جو اردو زبان و ادب کے فروغ کے لیے نہایت مفید ہو گا۔ اس حوالے سے پہلے بھی کافی وقیع کوششیں ہوئی ہیں تاہم تسلسل سے کام بوجوہ نہیں ہو سکا۔ اب محبانِ اردو میں سے کچھ نے رضاکارانہ طور پر آگے آ کر ایک انجمن تشکیل دی ہے جو مجلسِ برقی اشاعتِ ادبیاتِ عالیہ کے نام سے موسوم ہوئی ہے۔ یہ مجلس ان دنوں کلاسیکی ادب کو برقیانے میں نہایت سرگرمی سے کام کر رہی ہے اور دعا کی جانی چاہیے کہ خدا ان عاشقانِ پاک طینت کو استقلال عطا فرمائے۔

مجلس نے فیصلہ کیا ہے کہ اس کا کام انٹرنیٹ پر متعدد جگہوں پر شائع کیا جائے تاکہ نہ صرف زیادہ سے زیادہ قارئین اس سے استفادہ کر سکیں بلکہ کسی ویب گاہ کو پیش آنے والے تکنیکی مسائل کی وجہ سے یہ سرمایہ ضائع یا ناقابلِ رسائی ہونے سے بھی محفوظ رہے۔ ہمیں خوشی ہے کہ اراکینِ مجلس نے اس سلسلے میں جن ویب گاہوں کا انتخاب فرمایا ہے ان میں سے ایک اردو گاہ بھی ہے۔ مجلسِ برقی اشاعتِ ادبیاتِ عالیہ کی تمام پیشکشیں ان شاء اللہ تواتر سے اردو گاہ پر شائع ہوتی رہیں گی۔

اردو گاہ پر مجلس کے کام کے لیے شعبۂ ادبِ عالیہ قائم کر دیا گیا ہے جس تک آپ ہمارے مرکزی لائحہ (main menu) اور زیریں لائحہ (footer menu) کے اولین روابط سے پہنچ سکتے ہیں۔ ہر شائع شدہ کتاب ایک الگ مراسلے کی صورت میں ایک ہی صفحے پر مکمل پیش کر دی گئی ہے۔ ہر صفحے کے آغاز میں فہرست موجود ہے جس کے مندرجات کتاب کے مختلف ابواب سے مربوط ہیں اور آپ ایک کلک سے اپنی مرضی کے باب تک پہنچ سکتے ہیں۔ شعبۂ ادبِ عالیہ کا اپنا ذیلی لائحہ بھی تمام صفحات کے شروع میں موجود ہے جس کے ذریعے آپ کتب یا مصنفین کی فہرستوں تک رسائی حاصل کر سکتے ہیں۔

شعبۂ ادبِ عالیہ کی کتب اردو گاہ اور مجلسِ برقی اشاعتِ ادبیاتِ عالیہ کے تعاون سے پیش کی گئی ہیں۔
یہ صفحہ اپنے دوست احباب سے شریک کیجیے
Share on facebook
Share on twitter
Share on pinterest
Share on reddit
Share on linkedin
Share on whatsapp
Share on telegram
Share on email

ہم روایت شکن روایت ساز

پر

خوش آمدید!

نئی کتابیں

تنبیہ